semo in tre amissi del Veneto, che se ga preocupà de lassare calcossa de ch’el gran capitàe popolare, culturàe veneto che va in desmentega e che se perde un poco ogni giorno.
Ghemo pensà de fare calcossa de difarente dal sòito e cussì, al libro, ghe zontemo un CD o na casseta.
De sicuro ve divertì de più e scoltando le paròe inparè, magari, a lesare mejo el Veneto.
A tuti tre, da tanti ani oramai, ghe scanpa da scrivare in Veneto poesie, storie nostre e altre robe che ghe passa par el sarvèo.
UBALDO GOLDIN
Nato a Mosseese (PD) el se porta drio, da senpre, un muinèo de pensieri in Veneto. El ga fato le risserche dee paròe desmesse, dei modi de dire, dei proverbi, dee filastroche e dee tiratère, scalumando fin dove jera possibie e anca più in la. El ze, fra l’altro, l’autore dee "Spentonade".
MARIO BAGAGIOLO
Venessian nato e spuà, incocaio al spasemo dea so sità, ga curà l’inpostassion dei vari argomenti tratà e el ga fato la coression dee "bozze" co la pignolaria de uno che vansa schei.
UDINO RANZATO
De Piove (PD) ruspante rapresentante dea Sacisica se ga preocupà de tuta la parte tenica, stanpa e registrassion come uno che, oltre le paròe, sa misurare i canpi.
LUCIANA MINGARDO e ILARIA RUVOLO
che ringrassiemo de core, ne ga jutà in sta beissima fadiga.
PAOLO MATTERAZZO
se ga inpegnà, co professionaità, nea registrassion audio in suporto digitae e nea selta e esecussion dee musiche.
Bon divertimento e …
Ciao tosi