Barzelete

Tirolesi

Tre vecioti e uno salta fora cussì:

- Ma lo savio che desso xe cambià tute le paroe?

- Cossa vuto dire - ghe risponde staltri

-Vojo dire che no se poe pì dire che uno xe sordo, la ze na ofesa , se ga da dire che uno xe AUDIO LESO, desso semo in tempi moderni e bisogna parlare de fin.

-E uno che xe muto come xe che el se dise - ghe dimanda staltro

- Beh, uno che xe muto se dise che el xe FONO LESO, vedio che desso bisogna parlare con paroe moderne!.

- Senti che storie - dise el terso - e uno che xe orbo come xe che se diria? ciò?

- uno che xe orbo se dise che el xe VIDEO LESO, ostregheta.

- AAHH! Forse go capiò, ciò : - dise uno -  alora noantri tre che ghemo na serta età se dovaria dire che semo TIRO LESI, se no me sbalio.

La memoria

Tre vecioti se incontra e uno domanda ai altri: Ciò tosi cossa ze che ze pì difissie da soportare quando che se deventa veci?

Ciò - risponde uno -… quando che se deventa veci se no te ghè le gambe te fè fadiga a fare tuto, ciò, te te ghè da fare portare dapartuto e te ghè senpre bisogno de qualcun che te spenza la carega.

Noooo.. Nooo ..- interompe el secondo - ze i denti che te fa pesàre i ani, ze i dentiii! Penseve che mi me go da fare mazenare tuto col mazenin prima de magnare qualsiasi roba. Nooo… Nooo… ze i denti che te fa difarensa, me toca magnare solo roba che no se gabia da mastegare.

Nooo…. Vualtri no ghi capio proprio gnente…. - dise el primo - Ve lo digo mi cossa che ze inportante che no vegna mai a mancare quando che se deventa veci : ZE LA ME MO RI A. Ze la memoria. Quando che se deventa veci ze la memoria che te ciava.

Penseve (pausa) che l’altro dì ghe go dito ala Katiussia, la badante che ghemo in casa e che la vien dae tère foreste.

Katiussia – Voio a fare l’amor co mì?

E savio cossa che la me ga risposto?

Paroon lo ghemo fato sinque minuti fa!!

Ze la memoria… ze la memoriaaaa ....!!!!

El gato scaldapiè

Toni e Piero se incontra par la strada.

E la Toni! Come vala?

Mah Tuto ben. Invesse seto che sto inverno no riesso mai a dormire co i piè caldi!

I go senpre fredi tuta la note e no riesso a scaldarli fin matina.

No so pì cossa fare.

Valà che te insegno mi on bel modo de risolvare sto problema. Mi lo fasso tuti i inverni da tre quatro ani ormai.

Varda te fè cussì: te crompi on gato de quei col peo longo e po’ dopo te lo porti casa e quando che te vè dormire te lo meti ai piè del leto e te ghe meti in mezo al peo i piè. Te vedarè che tuta la note no te gavarè mai fredo ai piè.

A va ben.

Qualche giorno dopo i se ritrova:

Ciao Toni, cossa gheto che te si tuto sgrafà??

Ti e le to idee del piffaro.!!

Ma cossa te ze successo, conteme on fià.

Te recordito del gato?

Si , lo gheto crompà?

Sicuro che lo go crompà, beo bianco e co el peo longo da fare invidia.

Si questo lo go capio, ma dime parchè te si tuto sgrafà?

Parchè nol voleva che ghe tegnesse verta la boca par inpinirlo de acqua calda de bòio, sto fiol de un can.