Sarà po' vero?

(Mario Bagagiolo)

che da un toco no vedevo:

caminavo par le cale

ma no le riconossevo;

ogni piera gera smossa,

i palassi scheletrii

e le gondole somerse

da la melma, drento i rii;

tuto el ciel gera coverto

da ‘na nuvolassa nera

che vegniva da nord-ovest...

da la zona de Marghera;

gran motagne de scoasse

adornava ‘e fondamente;

la cità che ricordavo...

no me resta proprio gnente!

Che tristessa! Caminando

rivo drito in t’un campielo

e, sentai su do scalini

co de sora un capitelo,

vedo do veceti, bianchi,

le ganasse un fià incavae:

l’un, co barba rissa e folta,

el ga un’aria patriarcae,

l’altro, seco e picoleto,

el ga un far da fureghin;

i me vede, i s’alsa adasio

e i se curva in un inchin.

Cari veci pitoreschi

dei campieli venessiani,

(paré quasi scampai fora

da copioni goldoniani)

sù, vardé qua ‘sta Venessia

che se inquina,

che sprofonda,

che inmarsisse e se scolora

par el tempo e soto l’onda!

Vu sé placidi, tranquili,

rassegnai; ma finirà,

co la vostra grigia vita,

anca questa mia cità?

Qua me svegio;

la ganassa

Sente un fià de sbiseghin:

xe na lagrima;

sognando

go insupà tuto ‘l cussin.